Morai and Nan Pha Long Market

နန့်ဖာလုံ ဈေးနှင့် မိုရေးမြို့

တမူးကနေ လိုင်းကား (သို့) ဆိုင်ကယ် သုံးဘီး စီးသွားရင် အိန္ဒိယ နိုင်ငံ မိုရေးမြီု့နဲ့ ကပ်လျက်က နန့်ဖာလုံ ဈေးကို ရောက်ပါတယ်။ တစ်ယောက် ၂၀၀ ကျပ် ကျပါတယ်။ ၁၀ မိနစ် လောက်ပဲ ကြာပါတယ်။ နန့်ဖာလုံ ရွာမှာ ရှိလို့ ခေါ်တာပါ။ မြန်မာ နိုင်ငံသား ကသည်း လူမျိုးတွေ နေထိုင်တဲ့ ရွာကြီး ဖြစ်ပါတယ်။ တစ်ဖက်နိုင်ငံ
မိုရေးမြို့နဲ့ ကပ်လျက်ရှိပြီး မိုရေး မြို့သူ၊ မြို့သားတွေ ဈေးလာဝယ် နေကြတာ တွေ့ရပါတယ်။ အိန္ဒိယ နိုင်ငံသား အများ အပြား ဈေးလာ ဝယ်ကြလို့ အလွန်ပဲ စည်ကားလှ ပါတယ်။ တမူး မြို့သူ၊ မြို့သားတွေလဲ အိန္ဒိယ နိုင်ငံထွက် ကုန်ပစ္စည်း တွေကို လာဝယ် ကြပါတယ်။

ကုန်ပစ္စည်း တွေက စုံလှပါတယ်။ အိန္ဒိယ၊ ထိုင်း၊ တရုတ် ကုန်ပစ္စည်း တွေအပြင် မြန်မာ နိုင်ငံထွက် အစားအသောက်၊ အချဉ်ထုပ်၊ ယိုစုံ၊ ဆပ်ပြာနဲ့ အခြား လူသုံး ကုန်ပစ္စည်း တွေ ရောင်းချ ကြပါတယ်။ မိုရေးကနေ ဈေးထဲကို လွတ်လပ်စွာ ဝင်ထွက် သွားလာ နိုင်ကြပါတယ်။ နန့်ဖာလုံ ရွာနဲ့ တမူးမြို့ အထိ လာရောက် လည်ပတ်နိုင် ကြပါတယ်။ မိုရေးနဲ့ မြန်မာပြည် ကြားမှာ ခြံစည်းရိုး မရှိတော့ အတား အဆီး မရှိ ဝင်ထွက် သွားလာ နိုင်ကြပါတယ်။

မြန်မာ နိုင်ငံသားတွေ မိုရေး မြို့ထဲကို သွားရောက် လည်ပတ်ခွင့် မရှိပါ။ ဒါပေမယ့် ခြံစည်းရိုး အတား အဆီး မရှိ၊ အစစ် အဆေး မရှိတဲ့ အတွက် ဒီအတိုင်း သွားလာ လည်ပတ် နေကြပါတယ်။ တစ်ဖက် နိုင်ငံက လုံခြုံရေး သိပ်တော့ စိတ်မချရ ပါဘူး။ မဏိပူရ ခွဲထွက်ရေး သူပုန်တွေ လှုပ်ရှားမှု ရှိတဲ့ အတွက် မကြာခဏ ပစ်ခတ်မှုတွေ ဖြစ်ပွား တတ်ပါတယ်။

နန့်ဖာလုံ ဈေးရောက်တုန်း နန့်ဖာလုံ ရွာထဲ သွားရောက် လည်ပတ် နိုင်ပါတယ်။ ဈေးထဲမှာတော့ လုံခြုံရေး အရ ဓါတ်ပုံ ရိုက်ခွင့် မပြုပါဘူး။ တစ်ဖက် နိုင်ငံ သွားလည်ရင်လဲ သတိထား သွားလာဖို့ အကြံ ပေးချင်ပါတယ်။

Technorati Tag : , , ,

Author: Bamarlay

Bamarlay - Myanmar man is a blogger from Myanmar, currently living in Thailand.

Leave a Reply